Բրյուսել, 6 նոյեմբեր 2023 – Եվրոպական խորհրդարանի կիպրացի պատգամավոր Կոստաս Մավրիդեսի հրավերով և ՀՅԴ Հայ դատի Եվրոպայի գրասենյակի ու «Եվրոպացիները հանուն Արցախի» նախաձեռնության համագործակցության արդյունքում նոյեմբերի 7-ին Եվրոպական խորհրդարանում անցկացվելու է խորհրդաժողով՝ «Արցախահայության իրավունքները և Եվրոպական միությունը» խորագրով։
Խորհրդաժողովին մասնակցելու են հրավիրված միջազգային ճանաչում վայելող նշանավոր բանախոսներ։ Մասնավորապես Միջազգային քրեական դատարանի նախկին գլխավոր դատախազ Լուիս Մորենո Օկամպոն, Ցեղասպանության կանխարգելման Լեմկինի ինստիտուտի համահիմնադիր և իրավական հարցերով տնօրեն Վիկտորիա Մասիմինոն և միջազգային իրավունքի հայազգի մասնագետ Գառնիկ Քերքոնյանը։ Նախատեսվում է, որ նրանք կանդրադառնան Արցախում տեղի ունեցած վերջին զարգացումներին և Արցախի բնիկ հայ բնակչության իրավունքներին:
Խորհրդաժողովի նպատակն է քննարկել ստեղծված իրավիճակի հաղթահարման ուղղիները, 2020թ․ պատերազմից հետո Արցախում տեղի ունեցած իրադարձությունները՝ միջազգային իրավունքի, առհասարակ մարդու իրավունքների տեսանկյունից, ինչպես նաև անդրադառնալ միջազգային հանրության, հատկապես հակամարտության բանակցային գործընթացում ներգրավված ուժերի քաղաքական վարքին՝ հատուկ ուշադրություն դարրձնելով ԵՄ քաղաքական դերին։
Խորհրդաժողովի անցկացումից ժամեր առաջ, Բրուսելի մամուլի ակումբում տեղի կունենա ասուլիս խորհրդաժողովի բանախոսների և ՀՅԴ Հայ դատի Եվրոպայի գրասենյակի գործադիր տնօրեն Հեղինե Էվինյանի մասնակցությամբ: Մամուլի ասուլիսին հրավիրված են եվրոպական երկրներում գործող լրատվական միջոցների թղթակիցներ ու անհատ լրագրողներ, ինչպես նաև եվրոպական ուղեղային կենտրոնների (think-thank) ներկայացուցիչներ:
